Оштогу тополоңго байланыштуу 25 адам милиция бөлүмүнө алынып келинди

Ош облусундагы Төлөйкөн ипподромундагы тополоңго байланыштуу 25 адам милиция бөлүмүнө алынып келинди. Бул тууралуу аталган облустун ички иштер башкармалыгынын басма сөз кызматы билдирди.

Маалыматка ылайык, жарандар коомдук тартипти бузган жана чагымчылдык жасаган деп шектелүүдө. Учурда тергөө иштери жүрүп жатат.

Бөлүм ооруканага медициналык жардам сурап жети адам кайрылганын, алардын бири укук коргоо кызматкери экенин белгиледи.

Кошумчалай кетсек, нөөмөт кызматына 31-август күнү саат 18.50дө белгисиз адамдар «Форд Транзит» тез жардам унаасынын айнектерин сындырып кетишкендиги тууралуу маалымат түшкөн. Факты маалыматтын электрондук реестрине катталган.

Эске салсак, Ош облусунун “Төлөйкөн” ипподромунда “Достук” жана “Ынтымак” командаларынын көк бөрү боюнча президенттик кубогунун финалы жаңжал менен аяктаган. Окуянын күбөлөрү тарткан кадрлардан тез жардам унаасы таш бараңга алынып, бардык айнектерди талкалаганын көрүүгө болот. Чогулган эл унаалардын жүрүшүнө да тоскоолдук жаратты.