Социалдык объектилерди курууда Бишкектин вице-мэри жана мамкызматкерлер коррупцияга жол берген

Социалдык объектилерди курууда акча каражатын уурдоо боюнча коррупциялык схема аныкталды. Бул тууралуу УКМКнын басма сөз кызматы билдирди.

      УКМК мектептерди курууда бюджеттик каражаттарды бөлүштүрүү жана пайдалануу иштеринин жүрүшүндө коррупциялык схеманын болгондугуна байланыштуу кылмыш ишин тергеп жатат.

 Мектептердин жетишсиздиги көп жылдардан бери актуалдуу көйгөй болуп келгенине карабастан, жетекчилер өздөрүнүн жеке кызыкчылыгын көздөп, балдардын ден соолугуна жана өмүрүнө атайылап коркунуч келтирип, билим алуу мүмкүнчүлүгүнө тоскоолдук кылышкан. 

Бишкек шаарынын вице-мэри У.А.С. КР Өкмөтүнүн Аппаратынын курулуш, транспорт жана коммуникациялар бөлүмүнүн башчысы болуп кызмат өтөп турганда, жеке компаниянын кызыкчылыгын көздөө максатында коррупциялык схеманы уюштурган.

        Чүй облусунун Кош-Коргон айылындагы Т.Каракеев атындагы орто мектептин курулушун каржылоодо У.А.С. мамлекеттик курулуш комитетинин жана Чүй капиталдык курулуш башкармалыгынын кызматкерлери менен жен учунан сүйлөшүп алып, Г.П.С. ЖЧКсынын кызыкчылыгын бир нече жолу колдогону аныкталды.

         Такталган боюнча, тендердик мыйзамдардын талаптары жана курулуш нормалары бузулуп, натыйжада объектини жасалма ишке киргизүү жүргүзүлгөн. Жыйынтыгында мамлекеттик бюджетке 10,8 миллион сомдук зыян келтирилген.

         Тактап айтканда мектептин иш жүзүндө жер төлөөсү, ашкана, спорт залынын курулушу бүтпөй, имараттын фасады толук жабдылган эмес, айланасы жашылдандырылган эмес, коопсуздук системасы, электр менен камсыздоо иштери бүткөрүлгөн эмес.

        Азыркы учурда Бишкек шаарынын вице-мэри У.А.С., «Г.П.С.» ЖЧКнын башкы директору Т.Г.Т. жана КР Мамкурулуш Турак жай жана жарандык курулуш башкармалыгынын бөлүмүнүн башчысы А.Э.Ж. кармалып, УКМК ТКЖ УКЖ киргизилишти. 

        Ушундай эле текшерүү иш-чаралары мамлекеттин бюджетинен, гранттардын жана донорлордун каражаттарынын эсебинен курулган бардык мектептерге карата жүргүзүлүүдө.