Сүйүнбек Өмүрзаков: Жумушсуздук жоюлмайынча, жашоо-турмуш оңолбойт

Бүгүн, 10-февралдагы Жогорку Кеңештин жыйынында бир катар социалдык-экономикалык маселелер көтөрүлдү. Бул тууралуу Жогорку Кеңештин басма сөз кызматы билдирди.

Алсак, депутат Миргүл Темирбаева Лейлек районундагы бардык айылдар өзгөчө макам алышы керектигин белгилеп: “Маселен, тиешелүү тизмеге Көк-Таш айылы кирбей калган. Социалдык көйгөйлөрү арбын. Ичүүчү жана сугат суусу жетишсиз. Андыктан чек арага чектеш айылдарга колдоо көрсөтүп, элди көчүрбөй сактап калуу керек”, – деди.

Ал эми депутат Сүйүнбек Өмүрзаков өлкөдө балдарга татыктуу тарбия берүүгө көп көңүл бурулбай жатканын жүйө келтирип: “Мектептердин абалы начар. Меш менен ысыган окуу имараттары көп. Айрыкча алыскы айылдардагы мектептер каралбай калды” – деп кошумчалады. Мунун менен катар жумушсуздук күч алганын белгилеген депутат: “Жумушсуздук жоюлмайынча, жашоо-турмуш оңолбойт” – деп билдирди.