Токтогулда Mercedes Benz Sprinter менен жеңил унаа кагылышып, бир адам каза болду

Бишкек-Ош жолунда жол кырсыгынан бир адам каза болуп, алтоо жабыркады. Бул тууралуу Өзгөчө кырдаалдар министрлигинин басма сөз кызматы билдирет.

Маалыматка ылайык, Жалал-Абад облусунун Токтогул районундагы Бишкек-Ош унаа жолунун 260-чакырымында Honda CR-V жана Mercedes Benz Sprinter үлгүсүндөгү унаалардын катышуусунда жол кырсыгы катталган.

Кырсыктын кесепетинен 1956-жылы туулган С.Р. аттуу эркек киши каза болуп, 6 адам жабыркаган. Жерине 5 куткаруучу тартылып, каза болгон жаранды унаадан чыгарып, тез жардам кызматына өткөрүп беришкен.

Ал эми жабыркагандар Токтогул райондук ооруканага жеткирилген. Абалдары учурда оор деп эсептелинет.