77 жаштагы кыргызстандык V Дүйнөлүк көчмөндөр оюндарына велосипед менен сапар алды

77 жаштагы кыргызстандык V Дүйнөлүк көчмөндөр оюндарына велосипед менен сапар алды. 

Мамыт Таштанов жалпы 2016 чакырым жолду түрк тилдүү мамлекеттердин элдеринин достугун бекемдөө максатында басып өтөт. 

Ал 2022-жылдын 5-августунда Түркиянын Изник шаарында өткөн IV Дүйнөлүк көчмөндөр оюндарына велосипед менен барган.

Ош шаарынын мэриясынан маалымдашкандай, бүгүн, 1-августта Ош шаарынын борбордук аянтында V Дүйнөлүк көчмөндөр оюндарына катышуу үчүн Казакстандын Астана шаарына жол алган 77 жаштагы Ош шаарынын тургуну Мамыт Таштановду узатуу аземи болду. 

Иш-чарага Ош шаарынын мэриясынын, президенттин Ош облусундагы ыйгарым укуктуу өкүлчүлүгүнүн өкүлдөрү, карыянын жакындары катышты. Анда Мамыт Таштановго Ош шаарынын мэриясы тарабынан акчалай жардам көрсөтүлдү.